इतर मागास बहुजन कल्याण विभागातर्फे ज्ञानज्योती सावित्रीबाई फुले आधार योजनेत १७ ऑगस्टपर्यंत अर्ज ऑनलाईन पद्धतीने स्वीकारण्यात येत आहेत.

इतर मागास बहुजन कल्याण विभागातर्फे
ज्ञानज्योती सावित्रीबाई फुले आधार योजनेत १७ ऑगस्टपर्यंत अर्ज ऑनलाईन पद्धतीने स्वीकारण्यात येत आहेत.
इयत्ता १२ वीनंतरच्या व्यावसायिक तसेच बिगर व्यावसायिक अभ्यासक्रमामध्ये प्रवेश घेतलेल्या विद्यार्थ्यांना लाभ.

अकोला, दि. 4 : इतर मागास बहुजन कल्याण विभागातर्फे ज्ञानज्योती सावित्रीबाई फुले आधार योजना राबविण्यात येत असून, इतर मागासवर्ग, विमुक्त जाती व भटक्या जमाती आणि विशेष मागास प्रवर्गातील उच्च शिक्षण घेणा-या विद्यार्थ्यांनी योजनेचा लाभ घेण्याचे आवाहन सहायक संचालक डॉ. अनिता राठोड यांनी केले.
योजनेसाठी १७ ऑगस्टपर्यंत अर्ज ऑनलाईन पद्धतीने स्वीकारण्यात येत आहेत. इयत्ता १२ वीनंतरच्या व्यावसायिक तसेच बिगर व्यावसायिक अभ्यासक्रमामध्ये प्रवेश घेतलेल्या विद्यार्थ्यांना लाभ मिळू शकेल. इतर मागास बहुजन कल्याण विभागाच्या, आदिवासी विकास विभागाच्या, सामाजिक न्याय विभागाच्या किंवा संबंधित शैक्षणिक संस्थेच्या वसतिगृहामध्ये विनामूल्य प्रवेश मिळालेला नसावा.
योजनेत इतर मागास वर्ग, विमुक्त जाती व भटक्या जमाती आणि विशेष मागास प्रवर्गातील उच्च शिक्षण घेणा-या विद्यार्थ्यांसाठी भोजन भत्ता, निवास भत्ता व निर्वाह भत्ता या विद्यार्थ्यांना स्वतः उपलब्ध करून घेण्यासाठी आवश्यक रक्कम संबंधित विद्यार्थ्यांचे आधार संलग्न बँक खात्यामध्ये थेट वितरीत करण्यात येते.
विद्यार्थी महाराष्ट्र राज्याचा रहिवासी असावा. सक्षम प्राधिका-याने दिलेला जातीचा दाखला. विद्यार्थी अनाथ असल्यास महिला व बाल कल्याण विभागाकडील सक्षम प्राधिका-याचे अनाथ प्रमाणपत्र. विद्यार्थी दिव्यांग असल्यास प्रमाणपत्र आवश्यक, विद्यार्थ्यांचे पालकांचे वार्षिक उत्पन्न रु.२.५० लाख पेक्षा जास्त नसावे. आधार क्रमांक राष्ट्रीयकृत बँक खात्याशी संलग्न हवा.
विद्यार्थ्यांने प्रवेश घेतलेली शैक्षणिक संस्था ज्या शहराच्या/तालुक्याच्या ठिकाणी आहे अशा शहरातील सदर विद्यार्थी रहिवाशी नसावा. विद्यार्थी इयत्ता १२ वी नंतरचे उच्च शिक्षण घेत असावा. विद्यार्थ्यांना किमान ६० टक्के गुण व दिव्यांगास ५० टक्के गुण असणे आवश्यक आहे. वय ३० वर्षापेक्षा अधिक नसावे. विद्यार्थी कोणत्याही प्रकारची नोकरी किंवा व्यवसाय करत नसावा.